පුංචි කාලේ (නි) රස කතාවක්
හෑමෝම පුංචි කාලේ රස කතා කියන නිසා මටත් හිතුනා පොඩි කාලේ වෙච්ච සිද්ධියක් කියන්න. බ්ලෝග් කරන rate එක වැඩිද මන්ද, ඒත් මොකක් හරි මතක් වුනාම ලියලා දාන්නමයි හිතෙන්නේ :) ලියන්න පුළුවන් කාලේ උපරිම ලියමුකෝ නේ??
මේ කතාව වෙනකොට මට අවුරුදු 10ක් විතර ඇති. පොඩි කිව්වට පොඩිත් නෑ ඇට්ටර වයසනේ ;) අපේ ගෙවල් ගාව ගේකට කුලියට පවුලක් ආවා. පවුලක් කිව්වට අම්මයි, පුතයි, දුවයි විතරයි. තාත්තා රට කියලා තමයි ආරංචි වුනේ. පුතා මෙගේ වයසේ.
ඉතින් වැඩි දවසක් නොගිහින් මිනිහයි, මායි හොදට fit වුනා. ඉතින් සෙල්ලම් කරන ගමන් ගෙවල් වල විස්තර ගැනත් chat එකක් දානව දෙන්න.
“මචං, තාත්ති ළඟදී ලංකාවට එන්නේ නැද්ද?”
“නෑ මචං..අම්මා කියන්නේ තාත්තාට නිවාඩු ගන්න අමාරුයි ලු. කොටින්ම අවුරුදු 16කින් එයා ලංකාවට ඇවිත් නෑ.”
“මචං උඹට sure ද?
මං එහෙම ඇහුව්වේ මේ එක ඇහුවම මගේ ටිකිරි මොළේත් කචල් වෙච්ච හන්ද..
“ඔව් බං. මං ඉතින් කවදාවත් තාත්තාව දැකලාවත් නෑනේ. එයා ලොකු job එකක් එහේ කරන්නේ.”
මට නම් මෙතන මොකක්දෝ ලොකු අවුලක් තියනවා කියලා තේරුණා…ඒත් කියා ගන්න තේරෙන්නේ නෑ.
“එතකොට උඹේ දැන් වයස කීය ද?”
“මාත් උඹේ වයසේනේ”.
“උඹේ බොරු. උඹ මට වඩා වැඩිමල් ඇති.”
“වෙන්න බෑනේ. මමත් 5හේ පංතියේනේ..”
තවත් මේක කතා කොලොත් අපි දෙන්නටම පිස්සු හැදිලා ආයෙත් හැදෙන හන්දා..
“අපි අයිස් පැකට් එකක් බොන්ඩ යමු ද අහලා” මං ම track එක මාරු කලා.
