MC Food Court පරීක්ෂාව - II කොටස
ඔන්න ඊයේ මං පටන් ගත්තනේ මට කවදාවත් පාස් කර ගන්න බැරි වෙච්ච විභාගේ ගැන කියන්න. හැබැයි ඊයේ දුන්නේ කථාවට පොඩි teaser එකක් විතරයි. අද තමා ඉතින් හොදම ටික කියන්නේ..
ඇත්තටම නියම විභාගේ පටන් ගන්නේ ඔය Pizza කෑල්ලකුයි Coke එකකුයි අරන් දෙන්නත් එක්ක විභාග ශාලාවේ වාඩි වුනායින් පස්සේ. පලවෙනි පියවරවල් කොහොම හරි ගොඩ දැම්මත් ඕනා ජගතෙකුට හිර වෙන්න ගන්නේ පස්සේ පස්සේ තියන steps එකින් එක ගොඩ දාගන්න යද්දී…
පළවෙනියට නම් ලැබෙන්නේ බොහෝම සරල සැහැල්ලු ප්රශ්න..මේවාට හිත හිතා ඉන්න දෙයක් නෑ හැම එකටම කෙලින්ම “ඔව්” කියලා කියන්න තියෙන්නේ.. “අද හරි ලස්සන දවසක් නේ?”, “අපි දෙන්නා මෙහෙම ආවම හරිම නිදහස් නේ..”, “ඔයා නැතිකොට මට පාළුයි? ඔයාටත් එහෙමද?” “ඔයා මට ආදරේද?”, ”හැමදාමත් අපි මේ විදියට ආදරෙන් ඉම්මු..” මේවා තමා පළවෙනි වටයේ ප්රශ්න..අපෝ වැඩේ ලේසි නේ…
මෙහෙම බොහෝම ආදරෙන් සාමයෙන් වැඩේ යන අතරදී කොහෙන්දෝ පාත් වෙච්ච පිස්සු හෝන්තුවක් කොට්ට උරේකුත් ඇද ගෙන catwalk එකකින්, වෙන යන්න තැන් නැතුව වගේ අපේ table එක පහු කරන්නේ..ඒ වෙලාවට “මොකක්ද යකෝ මේ සමයම?” කියලා බලන්න ඔන මිනිහෙක්ගේ ඇස් ඒ දිහාවට හැරවෙනවනේ..නැත්ද? ඔන්න ඉතින් ඒ සමගම පටන් ගන්නවා දෙවනි ප්රශ්න වටය. “මං හිතුවේ නෑ ඔයා ඔය වගේ කෙනෙක් කියලා.” “මං ළඟ ඉද්දි ඔහොම බලනවා නම් මං නැතිකොට කොහොම බලනවා ඇද්ද?” “මට ඔයාව අප්පිරියයි…මං යනවා යන්න.” මේ ප්රශ්න වටේදී උත්තරයක් දෙන්නවත් වෙලාවක් ලැබෙන්නේ නෑ කෙලින්ම අසමත් කරලා දානවා මිසක..
කොහොම වෙතත් එහෙම වුනා කියලා මමත් වැඩේ අත හැරියේ නෑ. කොහොම හරි දවස ගානේ practice කරලා කරලා එක ඉරියව්වෙන් එක එල්ලේ බලා ඉන්න පුළුවන් ගානට concentration එක හදා ගත්තා. දැන් නම් අනර්කලී ආකර්ෂා නෙමේ Megan Fox ළඟින් ගියත් මගේ නෙමෙයි බෙල්ල හැරවෙන්නේ.
හැබැයි ඉතින් අපේ උනන්දුව උත්සහය විතරක් තිබිලා මදී මේ exam එක ගොඩ දාගන්න. අපිට නොපෙනෙන බලවේග වල උදව්වත් ඕනා. ඇයි එහෙම කියන්නේ? ජීවිතේට දැකලා නැති නෑයොත් පාත් වෙන්නේ ඒ වෙලාවට නේ.. “හලෝ..ඔයාව දැක්ක කල්? අපිටත් නොකියාම එකක් set කර ගත්තා නේ?? මරු මරු” කොහොම හරි උන්ට කතාවක් දාලා ගැලවුනා කියමු. මෙන්න පටන් ගන්නවා අළුත් ප්රශ්න වටය “කවුද ඒ??” “බප්පාගේ දුව” “බොරු කියන්න එපා. බාප්පගේ දුවට මොනාද ඔච්චර ඔයත් එක්ක කතා කරන්න තියෙන්නේ??” “කාලෙකින්නේ හම්බුනේ” “මට පේනවා ඒ කාලේ බොහොම ළගින් ඉදලා තියනවා කියලා.” “පිස්සුද ඔයාට?” “බොරු කියන්න එපා. මං දැකලා තියෙනවා ඒකි තමුසෙගේ facebook එකෙත් ඉන්නවා..” “හ්ම්..” “ඔව් ඉතින් මට වඩා ඒකි සුදුයිනේ… තමුසෙට ඒකි දැක්කම මං ඉන්නවද කියලත් අමතක වුනා.”
මේසේ තවත් අසාර්ථක exam round එකක් අවසන් වුණි.
කොහොම වෙතත් ඉතාමත් කලාතුරකින් අද නම් වාසනාව අපේ පැත්තේ යයි පෙනෙන්නට තියන දවස් ද උදා වේ. ඔන්න එදා නම් බොහොම ආදරෙන් දෙන්නා කිචි බිචි ගගා කෑවා බාහිර බලපෑම් මුකුත් නැතුව. අනේ examiner කිව්වනේ “හැමදාම ඔයානේ කෑම ගන්නේ ඒ හන්දා අද මං ගානේ dessert එක අරන් එන්නම්”.. අම්මට සිරි අද මොකක්ද මේ වේලා තියන වෙනස.. ඒ ගැන කල්පනා කර කර පොඩ්ඩක් ආතල් එකේ විසිල් එකකුත් ගගහා හිටියා විතරයි.. මෙන්න එක පාරට කඩා පැනපු examiner, ”මං අතන්ට යනකම් ඉදලා තමුසේ එහා පැත්තේ වාඩි වෙලා ඉන්න කෙල්ල දිහා බැලුවා නේද? බොරු කියන්න ලෑස්ති වෙන්න එපා මං ඔක්කොම බලන් හිටියේ..” “හුටා!”
ඔන්න ඔය විදියට කවදාවත් මට ඒ exam එක නම් ගොඩ දාගන්න බැරි වුනා. මේ exam එක පාරක් වත් fail නොවී සාර්ථකව ගොඩ දාපු කවුරු හරි පොරක් ඉන්නවා නම්, උඹේ photo එකත් එක්ක comment එකක් දාපන් උදේ හවා මල් තියලා වදින්න..
මේක කියවපු අපේ නංගීලාට කියන්න තියෙන්නේ සාන්තුවරයෙක් කියලා ඔයාගේ එක්කෙනා ගැන හිතන් ඉන්න අදහස වෙනස් කර ගන්න ඕන්නම් එයාවත් MC Food Court පරීක්ෂාවට නොපමාව භාජනය කරන්න :)
